Font Size:     

Whakarāpopoto Kōrero
Kei roto i tō tātou ao Māori he reo, he tikanga, he ahurea
hōhonu, ā, ko aua kōrero kei roto i ō tātou wharenui e
iri ana. I roto i ngā whare wānanga kāore tātou i te hoki
atu ki aua kōrero hei kaupapa matua mō ngā akoranga
i roto i ngā kura Māori. Ki te kore tātou e whakatairanga
i tō tātou reo, i ā tātou tikanga hoki ka ngaro ā-moa nei,
ā, ko ō tātou wharenui, ō tātou marae ka rite ki te whare
taonga, ka wahangū, e kore e taea te whakakōrero i
runga anō i te kore mōhio ki te reo, ki ngā tikanga rānei.
Mai runga ki raro kei te pā tēnei raru ki a tātou i roto i
ngā kura Māori katoa. Ko te mānuka nui mō tātou kei
ngā kura Māori: Ki te ui atu tātou i ngā pou o te whare,
ka mōhio anō tātou ki ngā whakautu? Ka pēhea hoki te
tangata pēnei i a Hine Tītama e kore nei e mōhio ki tōna
ake whakapapa me tōna ake reo engari he tohu kairangi
tōna? Ki te kore tātou e whakamahia ngā pātaka iringa
kōrero kāore e roa ka ngaro tō tātou pitomata, ka rite ki
a Hine Tītama, ka kuhu ki rō whare ka kite, ka whakamā
ka huri hei tangata kē (Hinenuitepō). Nā, mō tātou ko wai
atu hoki taua tangata?